लातूर मनपाचे आयुक्त बाबासाहेब मनोहरे यांचा आत्महत्येचा प्रयत्न, प्रकृती चिंताजनक
लातूर | 6 एप्रिल 2025:
लातूर महानगरपालिकेचे आयुक्त बाबासाहेब मनोहरे यांनी शनिवारी रात्री स्वत:वर गोळी झाडून आत्महत्येचा प्रयत्न केल्याची धक्कादायक घटना घडली आहे. रात्री 11.15 च्या सुमारास त्यांनी शासकीय बंगल्यातील खोलीत स्वत:च्या डोक्यात रिव्हॉल्व्हरमधून गोळी झाडली. यात ते गंभीर जखमी झाले असून सध्या लातूरमधील सह्याद्री रुग्णालयात त्यांच्यावर उपचार सुरू आहेत.
डॉक्टरांनी दिलेल्या माहितीनुसार, गोळी उजव्या बाजूने डोक्यातून आरपार गेली असून कवटीचे तुकडे मेंदूत पसरले आहेत. त्यामुळे त्यांची प्रकृती अत्यंत गंभीर आहे. मेंदूवर गंभीर इजा झाल्यामुळे शस्त्रक्रियेची तयारी करण्यात आली होती. मात्र, शस्त्रक्रिया पार पडली की नाही याबाबत अद्याप अधिकृत माहिती मिळालेली नाही.
ही घटना घडल्यानंतर मनोहरे यांचे कुटुंबीय आणि सहकारी हादरले आहेत. त्यांनी आत्महत्येचा प्रयत्न का केला, हे अद्याप स्पष्ट झालेले नाही. पोलीस या प्रकरणाचा तपास करत असून, घटनास्थळी पंचनामा करण्यात आला आहे.
बाबासाहेब मनोहरे हे कडक शिस्तीचे आणि स्पष्टवक्ते अधिकारी म्हणून ओळखले जातात. त्यांनी यापूर्वी धाराशिव आणि नांदेड जिल्ह्यांमध्ये यशस्वी प्रशासन दिले असून, लातूर महानगरपालिकेतही त्यांनी उत्तम कामगिरी बजावली होती.
सध्या डॉक्टर त्यांच्यावर जीव वाचवण्यासाठी शर्थीचे प्रयत्न करत आहेत. त्यांच्या प्रकृतीत सुधारणा व्हावी यासाठी शहरवासीय प्रार्थना करत आहेत.
