लातूर : पावसाळा सुरू होताच सापांचा मानवी वस्तीकडे होणारा वावर वाढला असून, अशा परिस्थितीत घाबरून सापांना ठार मारण्याऐवजी त्यांचे सुरक्षित रेस्क्यू करून त्यांना नैसर्गिक अधिवासात सोडण्याचे महत्त्वाचे काम लातूरचे सर्पमित्र करण कांबळे सातत्याने करत आहेत. नुकत्याच पार पडलेल्या काही दिवसांत लातूर शहर व परिसरातील विविध भागांतून तब्बल १५ ते २० सापांना सुखरूप रेस्क्यू करण्यात त्यांना यश आले आहे.घर, अंगण, शेत, गोठे तसेच इतर मानवी वस्तींमध्ये चुकून शिरलेल्या सापांमुळे नागरिकांमध्ये भीतीचे वातावरण निर्माण झाले होते. मात्र, प्रत्येक ठिकाणी तातडीने पोहोचून सर्पमित्र करण कांबळे यांनी कोणतीही दुखापत न होऊ देता सर्व सापांना सुरक्षितरित्या पकडले. त्यानंतर वन्यजीव संवर्धनाच्या नियमांचे पालन करत या सर्व सापांना त्यांच्या नैसर्गिक अधिवासात म्हणजेच जंगल किंवा सुरक्षित परिसरात सोडून देण्यात आले. त्यामुळे सापांचे प्राण वाचले, तसेच नागरिकांचाही धोका टळला.रेस्क्यू मोहिमेदरम्यान नागरिकांमध्ये जनजागृती करण्यावरही विशेष भर देण्यात आला. साप दिसल्यास घाबरून जाऊ नये, त्यांना मारण्याचा प्रयत्न करू नये, सुरक्षित अंतर ठेवून तज्ज्ञांना माहिती द्यावी, तसेच साप हे पर्यावरणाच्या अन्नसाखळीतील अत्यंत महत्त्वाचे घटक असून उंदीरांसारख्या पिकांचे नुकसान करणाऱ्या प्राण्यांवर नियंत्रण ठेवण्याचे महत्त्वाचे काम ते करतात, याची माहिती नागरिकांना देण्यात आली.यावेळी सर्पमित्र करण कांबळे यांनी नागरिकांना आवाहन करताना सांगितले की, “साप हे आपले शत्रू नसून निसर्गाचे मित्र आहेत. त्यांना मारू नका, त्यांना वाचवा. पावसाळ्यात सापांचा वावर वाढणे ही नैसर्गिक बाब आहे. त्यामुळे घाबरून चुकीचे पाऊल उचलू नका. साप दिसल्यास सुरक्षित अंतर ठेवा आणि तज्ज्ञांची मदत घ्या. योग्य वेळी केलेला एक फोन सापाचाही जीव वाचवू शकतो आणि माणसाचाही.”नागरिकांना सापांबाबत कोणतीही मदत किंवा रेस्क्यूसाठी आवश्यकता भासल्यास सर्पमित्र करण कांबळे यांच्याशी ९६९९२६१२२४ या क्रमांकावर त्वरित संपर्क साधण्याचे आवाहन करण्यात आले आहे. पावसाळ्याच्या पार्श्वभूमीवर नागरिकांनी सतर्क राहून वन्यजीव संरक्षणात सहकार्य करावे, असेही त्यांनी नमूद केले.
